Gaur Jorge Casaus-ekin hitz egin dugu, Vector 0 Robotics enpresako gerentearekin. Elkarrizketan zehar, haien teknologiari, Araban izan duten ezarpenari eta ekiteko garaian izan dituzten erronkei buruz aritu gara.
Nola sortu zen Vector 0 Robotics eta zerk bultzatu zintuzten urrats hau ematera Vector 0 Metrologiatik abiatuta?
Vector 0 Robotics industriak prozesuak automatizatzeko zituen beharrak ikusita sortu zen; izan ere, une hartan ez zitzaien irtenbiderik ematen. Gure izaera berritzailea dela eta, prozesu automatizatu horien abangoardian kokatu nahi izan genuen geure burua, batez ere kalitate-kontrolean eta, ondorioz, metrologian oinarrituta.
Zein motatako irtenbideak eskaintzen dituzue zehazki robotika kolaboratiboaren esparruan?
Eskaintzen ditugun irtenbideak neurrira egindako zelula automatizatuak dira, bezeroen beharretara egokitzen direnak. Horien bidez, erabilera errazten dugu eta industriako teknikariek gure irtenbideetara azkar moldatzeko aukera dute. Horregatik erabiltzen ditugu robot kolaboratiboak, erraz erabiltzen eta programatzen direlako.
Zerk bereizten du Vector 0 Robotics sektoreko beste enpresetatik?
Ekarpen eta bereizgarri nagusietako bat metrologian dugun ezagutza tekniko handia eta datuak aztertzeko gaitasuna dira. Horri esker, bezeroetara egokitu eta hainbat sektoretarako aplikazio askotarako robot bidezko zelula bereziak garatu ditzakegu.
Parteka dezakezu erabilera-kasuren bat edo zuen teknologiak nola laguntzen duen erakusten duen adibide praktikorik?
Robot bidezko zelulak egiteaz gain, industriarako garatu dugun kasurik berezienetako bat MOMA (Mobile Manipulator) izeneko sistema da. Sistema horrek AMR baten gainean muntatutako bi robot kolaboratibo ditu, eta ekoizpen-lantegiaren barruan edozein eragiketa egiteko aukera ematen dute. Kasu honetan, bereziki metrologia-sistema batera bideratuta dago, metrologia-gela lantegiko edozein puntutara eramatea ahalbidetzen diguna.
Nolakoa izan da Araban egin duzuen ezarpena? Zein eragilek lagundu dizuete martxan jartzen? Zer aukera eskaintzen dizkizue ingurune honek enpresa gisa hazteko?
Ezarpena oso ona izan da, eta inguruko enpresen aldetik harrera bikaina izan dugu. Innobide aholkularitzak lagundu digu ezarpenean eta enpresaren barruko estrategia batzuk martxan jartzen; gainera, Robotekin erakundeak Vector 0 Robotics Arabako ingurunean integratzen laguntzen digu.
Inguruneak aukera ugari eskaintzen ditu: beste enpresekin lankidetzan aritzeko aukeratik hasi eta Vector 0 Robotics ingeniaritzaren sektorean enpresa berritzaile eta aitzindari gisa garatzen laguntzeraino.
Robotekinen zaudete; zer lortu nahi duzue lankidetza horrekin?
Robotekinen ekosistematik bertako enpresekin sinergiak sortzea espero dugu, horien bidez ezagutzan eta enpresaren garapenean hazteko, baita gure aldetik ere ekosistema honen hazkundean gure alea jartzeko.
Zein izan da Vector 0 Robotics sortu zenetik izan duzuen erronkarik handiena?
Uste dut erronkarik handiena Vector 0 Robotics bera dela (barreak). Orain serio, enpresa gisa izan dugun erronka handienetako bat geure burua ezagutaraztea izan da, industriaren arazoak aztertzea eta bezero bakoitzarentzat irtenbide berritzaile eta egokia eskaintzea. Hori da benetan guretzat erronka handia.
Zer ikaskuntza nabarmenduko zenuke orain arteko zuen ekintzailetza-bidean?
Oztopoak gainditzeko eta merkatuaren aldaketetara egokitzeko gaitasuna funtsezkoa da; izan ere, bide konplexua da, batez ere hasieran, gorabeherak eguneroko kontua direnean. Eta porrot bat ez da horrela hartu behar, hazteko ikaskuntza gisa baizik.
Nola kudeatzen duzue ziurgabetasuna egunerokoan ekintzaile gisa?
Ziurgabetasuna kudeatzeko, gakoa da ebidentzietan oinarritutako erabakiak lehenestea, jarrera proaktibo eta malgu batekin. Arrakasta ez dago ezezaguna dena ezabatzean, baizik eta etapa bakoitzean irmotasunez aurrera egiteko erresilientzia indartzean.
Zer aholku emango zenioke bere startup propioa abiaraztea pentsatzen ari den norbaiti?
Zure kontrolpean dagoenean jarri arreta eta hartu erabakiak merkatuaren benetako ebidentzietan oinarrituta. Arrakastaren gakoa ez da hasieratik plan perfektua izatea, baizik eta etapa bakoitzean egokitzeko eta irmotasunez aurrera egiteko erresilientzia eta malgutasuna indartzea.
Galdera azkarren txanda
- Ekintzailetzari buruz gomendatuko zenituzkeen filmak? The Social Network, The Founder, Moneyball
- Inspiratzen zaituzten marka/enpresak: Relativity Space edo Boston Dynamics
- Lanean gehien motibatzen zaituen esaldia? “Neurtzen ez dena ezin da hobetu; baina zehaztasunez automatizatzen dena garaiezin bihurtzen da.”
- Historiako pertsonaiarekin bilera bat izan ahal izango bazenu, norekin izango litzateke? Leonardo da Vinci
- Iraganera itzuliko bazina, berriro ekingo zenioke? Zalantzarik gabe, bai.
Eskerrik asko zure denboragatik, Jorge.
