Zurekin kontakturik izan ez dutenentzat, nola sortu zen Loraontech eta zein behar konpondu nahi zenuten?

Loraontech duela hiru urte baino gehiago sortu zen, nire anaia eta biok Gasteiz inguruko lursail batean sentsoreekin esperimentatzen hasi ginenean. Hasieran jolasa zen, neurketa eta komunikazio modu ezberdinak probatuz, harik eta LoRaWAN teknologiaren potentziala deskubritu genuen arte: energia-kontsumo txikiko eta estaldura handiko irrati-maiztasuneko teknologia.

Gehien harritu gintuen gauza hori izan zen: landa-eremuetan sentsoreak instalatzea ahalbidetzen du, azpiegitura konplexurik gabe eta bost urte arteko bateriaren iraupenez. Berehala ikusi genuen nekazaritzan erabakiak hartzeko modua eraldatu zezakeela. Gure misioa argi geratu zen: landa-ingurunea modu errazean, iraunkorrean eta eskuragarrian digitalizatzea.

Nondik dator Loraontech izena?

Izena erabiltzen dugun teknologiatik zuzenean dator: “LoRa on Technology”, hau da, LoRa teknologiaren gainean eraikitako teknologia.

LoRa (Long Range) haririk gabeko komunikazio-teknologia bat da, Gauzen Internetera (IoT) bideratua. Datu sorta txikiak distantzia handira eta energia kontsumo txikiarekin bidali behar direnean aproposa da. WiFi edo 4G bezalako beste soluzioekin alderatuta, LoRa teknologiak landa edo eremu urrunetan dauden sentsoreak konektatzea ahalbidetzen du, estaldura mugikorrik edo sare elektrikorik gabe. Horri esker, ingurune agrarorako egokitutako soluzio errealak sortu ditzakegu, azpiegitura garesti edo konplexuen beharrik gabe. Hitzen jokoaz harago, izenak gure apustua islatzen du: teknologia sinplea, eraginkorra eta landa-ingurunearentzat eskuragarria.

Zer bereizten zaituzte merkatuan dauden beste soluzioetatik?

Loraontech-en ez gara sentsoreak edo software hutsa saltzera mugatzen. Gure gailuak diseinatu eta fabrikatzen ditugu, hirugarrenen teknologia integratzen dugu behar denean, eta guztiaren kudeaketa eraginkorra ahalbidetzen duen software propioa garatzen dugu. Hau da, hasieratik ezarpen finalera arte behar bakoitzera egokitutako soluzio osoa eskaintzen dugu.

Guztia guk kudeatzen dugu: antenak instalatzen ditugu, sentsoreak konfiguratzen ditugu, txosten pertsonalizatuak sortzen ditugu eta bezeroari laguntzen diogu jasotako datuak ulertu, interpretatu eta baliatzeko. Gainera, informazio guztia jatorrian geratzeko gure biltegiratze-sistema propioa garatzen ari gara. Helburua argia da: nekazariak bere datuen kontrol osoa izatea eta datu horiek ez amaitzea hirugarrenen zerbitzarietan.

Non ikusten duzue Loraontech datozen 2-3 urteetan?

Dena ondo badoa —eta horretan gogor ari gara lanean—, Loraontech sektore agroan finkatutako enpresa gisa ikusten dugu, baina baita agroindustria, industria 4.0 eta hiri adimendunak bezalako arloetara hedatuta ere.

Nekazaritza-munduan, nekazariei eta kooperatibei laguntzen jarraitu nahi diegu euren laboreak digitalizatzen, baliabideak (ura, ongarriak…) optimizatzen eta erabakiak datu errealetan oinarrituta hartzen. Baina horrez gain, aukera erraldoia ikusten dugu prozesu industrialen eraldaketa digitalean, non gure sentsoreek eta LoRa teknologiak tenperatura, hezetasuna, energia-kontsumoa edo mantentze prebentiboa bezalako aldagaiak monitorizatu ditzaketen, kostu oso baxuekin eta eraginkortasun handiarekin.

Smart cities arloan, uste dugu gure teknologiak balio handia eman dezakeela: airearen kalitatea, uraren kudeaketa, aparkalekuak, argiteria publikoa edo hiri-soinuak monitorizatzeko sentsoreen bidez. Hori guztia LoRaWAN sareen bidez, energia gutxi kontsumitzen duten eta estaldura handia duten soluzioak ezartzeko aukera emanez, azpiegitura garestirik gabe.

Horrez gain, gure software-plataformak askoz sendoago bilakatzea nahi dugu: tresna adimentsua, intuitiboa eta pertsonalizagarria, datuak denbora errealean bistaratzea eta gurutzatzea ahalbidetuko duena, adimen artifiziala aplikatuz ereduak detektatzeko edo gorabeherak aurreikusteko. Eta hori guztia burujabetza digitalaren filosofiaren barruan. Komunitate bakoitzak, enpresa bakoitzak edo nekazari bakoitzak bere datuen kontrol osoa izan dezala, plataforma handien menpe egon gabe.

Eta garrantzitsuena: hazten jarraitzea gure esentzia galdu gabe — gertutasuna, iraunkortasunarekiko konpromisoa eta teknologia erabilgarriaren aldeko pasioa.

Zein izan da orain arte ekitearen alde onena eta zailena?

Zailena izan da zalantzarik gabe ekintzailetza gure lanekin bateratzea. Proiektu hau aurrera ateratzea dedikazio handia eskatzen du eta hasieran ezin duzu zure lan nagusia utzi, beraz, lo orduei eta aisialdiari kendu behar diezu denbora.

Baina ideiak errealitate bihurtzen ikustea, bezeroek zuregan konfiantza jartzen hastea eta zure ahaleginak fruituak ematen dituela ikustea izugarrizko satisfazioa da. Une horretan sentitzen duzu egindako ahalegin guztiak merezi izan duela.

Zer ez da ikusten startup bat sortzearen atzean, eta jakin beharko litzateke?

Ez da ikusten ordu mordo bat daudenik atzean, kontsumitzen duen energia mentala, eta askotan ekintzailetzarekin datorren bakardadea. Ekitea da zerotik hastea, askotan argibide argirik gabe. Dena ikasi behar duzu: web bat nola sortu, fakturak nola egin, dirulaguntzak nola eskatu, hornitzaileekin nola negoziatu…

Prozesu bat da non askotan huts egiten duzun, eta huts bakoitzak berriro altxatzera, zuzentzera, ikastera eta aurrera egitera behartzen zaitu. Erresilientzia funtsezkoa da. Ez da ideia bat izatea soilik, baizik eta indarra izatea egunero adreilu bat jartzeko, jakin gabe eraikina zutik iraungo duen edo ez.

Atzera egin ahal izango bazenute, zerbait egingo zenukete bestela?

Bai, dudarik gabe. Berriz hasiko ginateke, baina hasieratik ikasitakoa aplikatuta. Horrela azkarrago aurrera egingo genuke eta akats gutxiago egingo genituzke.

Baina badakigu akats horiek ere beharrezkoak izan direla. Esperientzia, hein handi batean, askotan okertzetik eta aurrera jarraitzeaz osatua dago.

Nola uztartzen duzue ekintzailetza eta bizitza pertsonala? Baduzue ohiturarik edo “trukurik” oreka mantentzeko?

Ez da erraza, batez ere proiektuaz gain beste lan bat duzunean. Guri lagundu digun gauza nagusietako bat da helburu argi eta errealistak izatea, eta horiek pauso txiki eta neurgarrietan banatzea. Funtsezkoa da ere egonkortasuna izatea eta noiz gelditu jakitea: “gaur arte” esatea.

Eta ikuspegia partekatzen duen talde batez inguratzea. Momentu zailak datozenean, horrek aldea markatzen du. Ez dago formula magikorik, baina denbora ondo antolatzeak eta lorpen txiki bakoitza ospatzeak asko laguntzen du animoari eusteko.

Galdera azkarreko txanda

• Ekintzailetzari buruzko pelikula bat?

  • The Social Network: nola kudeatu gabeko anbizioak taldeak apurtu ditzakeen gogorarazten du. Inspiratzaile baino gehiago, bide batzuk saihestu behar direla erakusten du.
  • Coach Carter: diziplina eta helburu argi batekin errealitateak alda daitezkeela erakusten duen istorioa. Edonola ere, inspirazio hutsa ekintzaileentzat.

• Inspiratzen zaituzten marka/enpresak:

  • Netflix: hasierako eredua alboratzea ausardiaz hartu zuten, eta horrek liluratzen gaitu.

  • Steam (Valve): komunitateari entzuten diote, berritzen dute norabidea galdu gabe, eta kalitateari eusten diote modaren gainetik.

• Zuen lanean motibatzen zaituzten esaldia: “Arrakasta ez da inoiz ez erortzea, baizik eta erortzen zarenean beti altxatzea.”

• Historiako norbaitekin bilera bat izango bazenukete, norekin izango litzateke? Leonardo da Vinci. Artearen, zientziaren eta jakin-min mugagabearen arteko fusioa miresten dugu. Gaur egungo erronka teknologikoak nola ikusiko lituzkeen jakitea gustatuko litzaiguke.

• Iraganera itzulita, berriro ekingo zeniokete? Bai, inolako zalantzarik gabe. Ekitea bizitza errealeko master bat izan da guretzat. Akats gutxiago egingo genituzke agian, baina ez genuke aldatu ikasitako ezer.